काठमाडौं । आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै निर्वाचन आयोगले मतदाता सचेतना कार्यक्रमलाई तीव्र बनाएको छ। सोहीक्रममा आयोगले देशभरका विभिन्न जिल्ला तथा निर्वाचन क्षेत्रअनुसारका नमूना मतपत्र सार्वजनिक गरेको छ।

आयोगका अनुसार सातै प्रदेशका जिल्लामा रहेका निर्वाचन क्षेत्रको संरचनाअनुसार फरक–फरक प्रकारका नमूना मतपत्र तयार पारिएका छन्। एउटा मात्र निर्वाचन क्षेत्र रहेको जिल्लाका लागि एक प्रकारको र एकभन्दा बढी निर्वाचन क्षेत्र भएका जिल्लाका लागि फरक प्रकारका नमूना मतपत्र सार्वजनिक गरिएको हो।

उम्मेदवारको सङ्ख्याअनुसार मतपत्रको आकार पनि फरक हुने आयोगले जनाएको छ। धेरै उम्मेदवार रहेका निर्वाचन क्षेत्रमा ठूलो आकारको र कम उम्मेदवार भएका क्षेत्रमा सानो आकारको मतपत्र प्रयोग गरिनेछ। विशेषगरी सबैभन्दा धेरै निर्वाचन क्षेत्र र उम्मेदवार रहेको काठमाडौं जिल्लामा प्रयोग हुने मतपत्र आकारमा ठूलो हुने आयोगको भनाइ छ।

कर्णाली प्रदेशअन्तर्गत सल्यान, डोल्पा, मुगु, जुम्ला, कालिकोट, हुम्ला, जाजरकोट र रुकुमपश्चिममा एक–एक निर्वाचन क्षेत्र रहेका छन् भने दैलेख र सुर्खेतमा दुई–दुई निर्वाचन क्षेत्र रहेका छन्। ती जिल्लाका वास्तविक नमूना मतपत्रसमेत आयोगले सार्वजनिक गरिसकेको जनाएको छ।

यस्तै, सुदूरपश्चिम प्रदेशका बाजुरा, बझाङ, डोटी, दार्चुला, बैतडी र डडेल्धुरामा एक–एक निर्वाचन क्षेत्र रहेका छन्। अछाममा दुई, कञ्चनपुरमा तीन र कैलालीमा पाँच निर्वाचन क्षेत्र रहेका छन्। यी सबै निर्वाचन क्षेत्रका नमूना मतपत्रसमेत सार्वजनिक भइसकेको आयोगले जानकारी दिएको छ।

आयोगका अनुसार अन्य जिल्लाका वास्तविक मतपत्र पनि क्रमशः सार्वजनिक गरिँदै जानेछ। हाल जनक शिक्षा सामग्री केन्द्रमा प्रत्यक्ष निर्वाचनतर्फको मतपत्र छपाइको काम जारी रहेको छ भने समानुपातिक निर्वाचन प्रणालीतर्फको मतपत्र छपाइ सम्पन्न भइसकेको छ।

मतदातालाई मतदान प्रक्रिया बुझाउन सहयोग पु¥याउने उद्देश्यले नमूना मतपत्र प्रयोग गरी देशभर मतदाता सचेतना कार्यक्रम सञ्चालन भइरहेको आयोगले जनाएको छ। ती नमूना मतपत्रहरू सम्बन्धित मतदान केन्द्र मातहत पु¥याउने कामसमेत तीव्र रूपमा अगाडि बढाइएको छ।