काठमाडौं । संसदमा विचाराधीन रहेको विद्यालय शिक्षा विधेयक तत्काल जारी गर्नुपर्ने माग गर्दै जारी शिक्षक आन्दोलनप्रति नेपाली कांग्रेसको पेशागत तथा बुद्धिजीवी विभागले गम्भीर चासो व्यक्त गरेको छ।
विभाग प्रमुख डा. डिला संग्रौलाले एक वक्तव्य जारी गर्दै शिक्षकहरूका जायज माग तत्काल सम्बोधन गर्न नेपाल सरकारसँग आग्रह गर्नुभएको छ। उहाँले २०८० साल असोज ५ गते नेपाल सरकार र शिक्षक महासंघबीच भएको सहमति कार्यान्वयन हुनुपर्नेमा जोड दिँदै शिक्षाको समग्र गुणस्तर सुधार, शिक्षा प्रणालीलाई सीप र रोजगारीसँग जोड्नुपर्ने र सामुदायिक विद्यालयहरूलाई सुविधा सम्पन्न बनाउन ढिलासुस्ती नगर्न सरकारलाई सचेत गराउनुभएको छ।
“शिक्षक कर्मचारीको सेवा, सुविधा र सम्मान सुनिश्चित गर्न अब ढिला गर्नु हुँदैन,” डा. संग्रौलाको भनाइ छ। उहाँले आन्दोलनरत शिक्षकहरूको माग नेपालको संविधानको मर्म र भावना अनुकूल रहेको उल्लेख गर्दै वार्ता र संवादमार्फत समस्याको समाधान खोज्न सरकार र शिक्षक महासंघ दुवै पक्षलाई आग्रह गर्नुभएको छ।
तपाईको बिचार