काभ्रेपलान्चोक। बागमती प्रदेशका साम्सद तथा पूर्वश्रम, रोजगार तथा यातायात मन्त्री लक्ष्मण लम्सालले समाज कस्तो छ भन्ने कुराको मानक त्यहाँको शिक्षा क्षेत्रको लगानी र विकासले दर्शाउने बताएका छन् ।

काभ्रेपलान्चोकको पाँचखाल नगरपालिका वडा नम्बर २ ज्यामिरकोटमा रहेको ज्ञानोदय आधारभुत विद्यालयको हाताभित्रको घेराबार शिलान्यास तथा विद्यार्थिहरुलाई न्यानो कपडा वितरण कार्यक्रममा बोल्दै नेकपा (एकीकृत समाजवादी) का पोलिटब्यूरो सदस्यसमेत रहेका लम्सालले कुनै पनि समाज कस्तो छ भन्ने मानक त्यो ठाउँको स्कुलले दर्शाउने बताए ।

उनले भने विद्यालय हामी सबैको साझा सम्पत्ति हो। कुनै पनि समाज सभ्य, सु संस्कृत छ भन्ने मानक त्यो गाउँको विद्यालय र त्यहाँका मान्छेको चेतनाले बताउँछ। त्यस कारण आफ्नो ठाउँमा रहेका विद्यालयलाई सुधार्नु जरुरत छ। जनप्रतिनिधि सधैं जनतासँगै रहि काम गर्नुपर्ने प्रष्ट पार्दै बिद्यालयको भौतिक सुधारमा आफू लाग्ने समेत लम्सालले बताए । सो अवसरमा नेता लम्सालले विद्यालयको घेराबार शिलान्यास गरेका थिए ।

विद्यालय ब्यवस्थापन समितिका अध्यक्ष प्रल्हाद दाहालले, विद्यालयको शैक्षिक तथा भौतिक सुधारमा लागि परिरहेको र सबैको साथ सहयोग मिलेमा नमुना बिद्यालय बन्ने बताए । विद्यार्थी संख्यामा कमि आएकोमा चिन्ता व्यक्त गर्दै उहाँले भौतिक पूर्वाधार राम्रो भएर मात्रै हुदैन्, विद्यालयमा बिद्यार्थी बढाउन सबैजना लाग्नु पर्ने बताए ।

कार्यक्रममा अतिथिहरु वडा अध्यक्ष रामेश्वर दाहाल, समाजसेवी लोकनाथ (रामकाजी) सापकोटा, अतिथिहरु पूर्व वडाअध्यक्ष हरि खतिवडा, छिमेकी विद्यालय ज्ञानेश्वरी मा.वि.का प्र.अ. विनोद राई, पूर्वव्यवस्थापन समितीका अध्यक्ष रामकुमार तामाङ, पूर्व शिक्षक बिनोद सापकोटा, माधब नेपाल , शिक्षक, अभिभावक र विद्यार्थीहरुको उपस्थिति रहेको थियो ।

२०४५ सालमा स्थापित ज्ञानोदय आधारभूत विद्यालयमा पर्खाल निर्माणका लागि बागमती प्रदेश सरकार मार्फत रु १० लाख विनियोजन भएको थियो। कार्यक्रममा स्थानिय बुद्धिजिवी लोकनाथ सापकोटाले आफ्नो ८१ औं जन्म दिनको उपलक्ष्यमा विद्यालयका बालबालिकालाई जाडोमा लगाउन न्यानो कपडा सुइटर वितरण भएको थियो । शिलान्यास कार्यक्रमको अध्यक्षता विद्यालय व्यवस्थापन समितिका अध्यक्ष प्रल्हाद दाहालले गरेका थिए ।