कैलाली, २७ पौष ।  उपप्रधान तथा रक्षामन्त्री पूर्णबहादुर खड्काले वर्तमान सरकारले जनताको शिर झुकाउने गरी कुनै पनि काम नगरेको बताएका छन् ।

शुक्रवार नेपाली कांग्रेस कैलाली क्षेत्र नम्बर १ द्वारा आयोजित भेटघाट कार्यक्रममा कांग्रेस उपसभापति समेत रहेका खड्काले सरकारले मध्यमस्तरको काम गरिरहेको बताए । जनता र सेवाग्राहीसँग जोडिएका विषयमा हुने झन्झट, अप्ठ्यारोपन, ढिलासुस्तीले परेको नकारात्मकता हटाउन सरकारले काम गरिरहेको उपप्रधानमन्त्री खड्का भनाइ छ ।

‘हामीले जनताका लागि कति राम्रो काम गर्न सकेका छौँ, त्यो जनताका बीच छलफल हुने नै छ’, उनले भने, ‘वर्तमान सरकारले निकै राम्रो काम गरेको छ पनि भन्दिन । तर सरकारले मध्यमस्तरमा रही काम गरेको छ । जनताको शिर झुकाउने गरी कुनै पनि काम गरेको छैन ।’

उनले सरकार सुशासनको अभियानमा रहेको समेत उल्लेख गरे। मुलुकको शिक्षा, जलस्रोत, स्वास्थ्यलगायतका क्षेत्रमा भएका विकास कांग्रेसको नेतृत्वमा भएको भन्दै यसबिच भएका कमीकमजोरी सुधार गर्दै जाने उपसभापति खड्काले  बताए ।