अत्तरिया । उपप्रधानमन्त्री एवम् शहरी विकास मन्त्री प्रकाशमान सिंहले कैलालीकाे गाेदावरी नगरपालिका वडा नं ३ मा नवनिर्मित
एकिकृत फोहोरमैला व्यवस्थापन केन्द्र तथा दिशाजन्य पदार्थको प्रशोधन प्रणालीकाे उद्घाटन गर्नुभएकाे छ । बिहिबार उपप्रधानमन्त्री सिंहले गोदावरी नगरपालिका वडा नं. ३ चौकीडाँडामा बनेकाे फोहोरमैला व्यवस्थापन केन्द्रको निर्माण कार्य सम्पन्न भइ संचालनका उद्घाटन गर्नुभएकाे हाे ।

एसियाली विकास बैंक (एडिबी) को ऋण अनुदान सहयोग र नेपाल सरकारको सहकार्यमा क्षेत्रीय सहरी विकास आयोजना कार्यालय, धनगढीको संयोजनमा केन्द्रको निर्माण गरिएको हो । केन्द्र उद्घाटन गर्दै उपप्रधानमन्त्री सिंहले विश्व वातावर्ण दिवसकै दिन फाेहाेर मैला व्यवस्थापन केन्द्र शुरू हुनु खुशीकाे विषय भएकाे बताउनुभयाे । उहाँले फाेहाेरमैला केन्द्र शुरू भएपछि गाेदावरीसहित याे क्षेत्रकाे वातावरण स्वच्छ हुने र फाेहाेर मैलाकाे उचित व्यवस्थान हुने विश्वास व्यक्त गर्नुभयाे । नागरिककाे जीवन र जीविका सहज बनाउन सरकारले जनताले प्रत्यक्ष अनुभूत गर्ने याेजना निर्माण सरकारकाे प्राथमिकतामा रहेकाे साे क्रममा उपप्रधानमन्त्री सिंहले बताउनुभयाे ।

कुल लागत ५१ करोड ६९ लाख ७४ हजार ४ सय ९९ रुपैयाँ रहेको यस परियोजनामा ७५ प्रतिशत रकम एडिबीको ऋण अनुदानबाट र बाँकी २५ प्रतिशत नेपाल सरकारको लगानीबाट पूरा गरिएको हो ।फोहोरमैला व्यवस्थापन केन्द्र निर्माणको ठेक्का चिनको सिचुवान प्रोभेन्सियल जियोलोजिकल इन्जिनियरिङ कम्प्लेक्सलाई दिइएको थियो । करिब पाँच हेक्टर क्षेत्रफलमा फैलिएको यो केन्द्र तीन वर्षसम्म निर्माण कम्पनीकै व्यवस्थापनमा रहनेछ । उक्त अवधिपछि गोदावरी नगरपालिकालाई हस्तान्तरण गरिने सम्झौता गरिएको छ ।

केन्द्रमा संकलित फोहोरलाई वर्गीकरण गरिनेछ । कुहिने फोहोरबाट कम्पोस्ट मल उत्पादन गरिनेछ भने रिसाइकल गर्न सकिने फोहोरलाई कवाडीमा बिक्री गरिने बताइएकाे छ । यसबाट वातावरणीय प्रदूषण न्यूनीकरण हुने र स्थानीय कृषकलाई जैविक मल प्राप्त हुने अपेक्षा गरिएको छ ।

स्थानीय रोजगारीलाई प्राथमिकता दिँदै केन्द्रमा ४० जना भन्दा बढी स्थानीयलाई योग्यता अनुसार रोजगारी प्रदान गरिने बताइएकाे छ । कुहिने फोहोरबाट मलखाद बनाउनुका साथै नकुहिने, तर पुनःप्रयोग गर्न सकिने बस्तु प्रशोधन गरिने भएकाले फोहोरमैला व्यवस्थापन केन्द्र आम्दानीको स्रोत समेत गाेदावरी नगरपालिकाका नगरप्रमुख विरेन्द्र भट्टकाे भनाई छ ।