विराट कोहलीले टेस्ट क्रिकेटबाट सन्यास लिएका छन् ।

कोहलीले सोमबार इन्स्टाग्राममा लेखेका छन्– टेस्ट क्रिकेटले मलाई परिक्षण गरयो,  मलाई आकार दियो, मलाई पाठ सिकायो जुन म जीवनभर सम्झिरहनेछु।

खासमा कोहलीले मे १० मा बीसीसीआईलाई टेस्ट क्रिकेटबाट सन्यास लिन चाहेको बताएका थिए । बोर्डले कोहलीलाई आफ्नो निर्णयमा पुनर्विचार गर्न आग्रह गरेको थियो। मे ११ मा बोर्डका एक अधिकारीले पनि उनीसँग कुरा गरेका थिए ।

डिसेम्बर–जनवरीमा अस्ट्रेलियामा भएको बोर्डर–गावस्कर सिरिजमा विराटको प्रदर्शन राम्रो थिएन। उनले यस सिरिजमा २३.७५ को औसतमा रन बनाए। र ८ मध्ये ७ पटक उनी अफ स्टम्प बाहिरको बलमा आउट भएका थिए । कोहलीले बीजीटीमा ९ इनिङ्समा १९० रन बनाएका थिए । जसमा एक शतक पनि समावेश थियो।

विराट कोहलीले १२३ टेस्ट खेलेका छन् । उनले ३० शतक र ३१ अर्धशतक प्रहार गरेका छन् । विराटले ७ दोहोरो शतक प्रहार गरेका छन् । उनी २०१७ र २०१८ मा ‘टेस्ट प्लेयर अफ द इयर’ चुनिएका थिए ।

विराटले इन्स्ट्राग्राममा लेखेका छन्, ‘मैले १४ वर्षअघि टेष्ट क्रिकेटमा पहिलो पटक ब्यागी नीलो जर्सी लगाएको थिएँ । इमानदारीपूर्वक, मैले यो ढाँचाले मलाई यस्तो यात्रामा लैजान्छ भन्ने सोचेको थिएन। यसले मलाई परिक्षण गर्यो, मलाई आकार दियो, र मलाई पाठ सिकायो म मेरो जीवनभर मसँग बोक्नेछु।

सेतो जर्सीमा खेल्नु मेरो लागि धेरै विशेष र व्यक्तिगत अनुभव हो। कडा परिश्रम, लामो दिनहरू, साना पलहरू जुन कसैले देख्दैनन्, तर तिनीहरू सधैंभरि तपाईंसँग रहन्छन्। यो ढाँचाबाट टाढा जाँदा यो सजिलो हुने छैन तर यो अहिलेको लागि सही महसुस गर्दछु। मैले यो मेरो सबै दिएँ र यसले मलाई सोचेभन्दा बढी दिएको छ।  म खेलप्रति आभारी छु, मैदानमा भएका मानिसहरू र मलाई यो यात्रामा अगाडि बढाउने सबैलाई। म सधैं मुस्कानका साथ मेरो टेस्ट करियरमा फर्केर हेर्नेछु।’

उनले आफ्नो जर्सी नम्बर ‘२६९’ लेखेर ‘साइनिङ अफ’ लेखेका छन् ।

उता, बीसीसीआईले पनि विराट कोहलीलाई धन्यवाद दिएको छ । बोर्डले लेख्यो – टेष्ट क्रिकेटमा एक युगको अन्त्य भएको छ तर विरासत जारी रहनेछ । उनले टीम इण्डियामा दिएको योगदान सधैं सम्झिरहनेछ।’