झापा । पूर्वी तराईका राजवंशी, ताजपुरिया,गनगाईलगायतका आदिवासी जातिको मौलिक परिकार भाक्कालाई प्रवर्द्धन गर्नका लागि शुरु गरिएको भाक्का दिवसका अवसरमा विभिन्न ठाउँमा कार्यक्रम आयोजना गरिएको छ ।

भाक्का दिवसको अवसरमा पूर्वेली मजदुर यातायात प्रालि र बन्दगी युवा परिवारले भोलि शनिवार विराट सहकारी भवन अगाडि भाक्का उत्सव आयोजना गर्दैछन् । मौलिक परिकार भाक्कालाई प्रवर्द्धन गर्नका लागि भाक्का उत्सव आयोजना गरिएको पूर्वेली मजदुर यातायात प्रालिका हरि बाँस्कोटाले बताए । बिर्तामोड ३ का वडा सदस्यसमेत रहेका बास्कोटाले भोलि बिहान ६ बजेदेखि भाक्का खुवाउने कार्यक्रम रहेको जानकारी दिए ।

त्यस्तै अभय राजवंशी नेतृत्वको राजवंशी समाज विकास समितिले पुष २९ गते बिर्ताबजारस्थित डोमालाल राजवंशी रंगशालामा भाक्का दिवस आयोजना गर्ने भएको छ । कार्यक्रममा नेपाली राष्ट्रिय क्रिकेट टोलीका खेलाडी ललित राजवंशीलाई सम्मान गर्ने बताइएको छ ।

त्यस्तै उत्तम राजवंशी जिल्ला अध्यक्ष रहेको अर्को राजवंशी समाज विकास समितिले एकदिन अगावै पुष २८ गते भद्रपुरमा भाक्का उत्सव गर्ने जनाएको छ ।