कालिकोट। नेकपा ( एकीकृत समाजवादी) कालिकोट जिल्ला कमिटी अध्यक्षमा चित्रसिंह गाउँले सर्वसम्मत रुपमा चयन भएका छन् ।

शुक्रबार सम्पन्न जिल्ला कमिटी सचिवालयको तेह्रौं बैठकमार्फत अध्यक्षमा गाउँले सर्वसम्मत निर्वाचित भएका हुन् । पार्टी विधानले एक व्यक्ति एक जिम्मेवारी भन्ने व्यवस्थाका साथै पार्टीका अन्तरपार्टी निर्देशनमा रहेर जिल्ला अध्यक्ष विश्वराज बमले जिम्मेवारी गाउँलेलाई हस्तान्तरण गरेका हुन् ।

बम महाधिवेशनद्वारा केन्द्रीय सदस्य निर्वाचित भएका छन् । यसैगरी जिल्ला कमिटी उपाध्यक्षमा चन्द्र बहादुर शाहीलाई मनोनयन गरिएको छ भने खाँडाचक्र नगरपालिकाका प्रमुख कमलबहादुर शाही यसअघिदेखि उपाध्यक्ष थिए ।
सचिवमा कृष्णकला पाण्डे छन् । बैठकले उपसचिवमा डबल बोगटी यसअघिदेखि कायमै रहेकोमा थप उपसचिव अशोक कुमार शाहीलाई चयन गरेको छ।

संविधानसभा सदस्य तुलाराम बिष्ट, केन्द्रीय सदस्य तुलाराज सिम्खाडा र बिजया बिष्टको विशेष उपस्थितिमा सम्पन्न बैठकले कार्तिक २६ र २७ गते हुने प्रदेश पार्टी अधिवेशनका लागि प्रतिनिधि छनौट गर्न निर्वाचन कमिटी समेत गठन गरेको सचिव कृष्णकला पाण्डेले जानकारी दिए ।