काठमाडौं । डा. बावुराम भट्टराई नेतृत्वको नेपाल समाजवादी पार्टी (नेसपा) ले एक सय ५१ सदस्यीय केन्द्रीय समिति हुने प्रस्ताव गरेको छ ।

 सोमबारबाट पोखरामा सुरु हुने पार्टीको प्रथम विधान अधिवेशनमा पेस हुने मस्यौदामा त्यस्तो प्रस्ताव पेश गरिएको हो ।
प्रस्तावित विधानमा एक जना अध्यक्ष, उपाध्यक्ष पाँच जना, महासचिव एक, उपमहासचिव दुई, सचिव सात र एक जना कोषाध्यक्ष सहित १७ सदस्यीय पदाधिकारी रहने उल्लेख छ ।  नेसपाको सङ्गठनात्मक स्वरूप र संरचनामा पार्टीको सर्वोच्च निकाय राष्ट्रिय महाधिवेशन रहनेछ ।

त्यसपछि सङ्घीय परिषद्, केन्द्रीय समिति, केन्द्रीय राजनीतिक समिति, केन्द्रीय कार्यकारिणी समिति, केन्द्रीय सल्लाहकार समिति, केन्द्रीय विज्ञ परिषद्, केन्द्रीय अनुशासन तथा सदाचार आयोग, केन्द्रीय निर्वाचन आयोग, केन्द्रीय लेखा आयोग र विभागहरू हुने व्यवस्था गरिएको छ ।